…DÜNYADAN NƏ GÖZƏL BİR İNSAN GEDİR
Yəqin diqqətli oxucunun nəzərindən yayınmayıb ki, hər dəfə Faxralıdan, faxralılardan yazanda vurğulayıram ki, bu elin yetirmələrinin sorağı çoxdan Borçalının hüdudlarını aşaraq Azərbaycana və bütün türk dünyasına yayılıb. Təbii ki, bu kəndin hər bir övladı kimi, həmyerlilərimin uğurundan mən də böyük iftixar hissi keçirir və hər yazımda bunu dönə-dönə vurğulamaqdan zövq alıram. Niyə də qürur duymayım?! Bu gün həyatımızın elə bir sahəsini tapmaq çətindir ki, Faxralının yetirməsi olan heç olmasa bircə nəfər bu sahənin tanınmış mütəxəssisi olmasın. İctimai-siyasi həyatda da belədir. Neçə-neçə ictimai xadimi, incəsənət ustası ilə öyünür həm də faxralılar. Bu yazıda isə mən şəfalı əlləri ilə minlərlə ailəyə sevinc bəxş edən hakimlərimizdən biri haqqında söhbət açmaq istəyirəm.
…Qurban Bayraməli oğlu Piriyev 1939-cu il may ayının 9-da Borçalıda – o zamankı Lüksemburq (indiki Bolnisi) rayonunun Faxralı kəndində anadan olub. 1946-cı ildə kənddəki orta məktəbin birinci sinfinə daxil olub. 1956-cı ildə orta təhsilini başa vurub. Təbii ki, yaşıdlarının çoxu kimi, onun da arzusu olub ki, ali təhsil alsın. Amma hərbi xidmətə çağırılması bu arzusunun reallaşmasını bir qədər ləngidib. Yalnız 1959-cu ildə ordu sıralarında tərxis olunduqdan sonra Bakıya gələrək sənədlərini Azərbaycan Dövlət Tibb İnstitutunun stomotologiya fakültəsinə verib və imtahanlardan uğurla çıxaraq tələbə adını qazanıb. Tələbəllik illərinin əziyyətli, lakin şirin illərini yaşayıb. Oxumaq sarıdan çətinliyi olmasa da, maddi durumu onu həm də işləməyə vadar edib. Gündüzlər oxuyub, gecələr isə kiçik tibb işçisi kimi fəaliyyət göstərib. Kim bilir, bəlkə bu da talenin onun qismətinə yazdığı yazı imiş ki, hələ tələbə ikən nəzəri biliklərini təcrübədə möhkəmlətmək imkanı qazanıb, ali məktəbi bitirib müstəqil fəaliyyətə başlayanda çətinlik çəkməyib.
1966-cı ildə institutu fərqlənmə diplomu ilə bitirib və təyinatla Naftalan şəhərinə göndərilib. Buradakı sanatoriyada həkim-stomotoloq kimi fəaliyyətə başlayıb. Savadı, qabiliyyəti ilə yanaşı səmimiliyi, ürəyigenişliyi və həssaslığı ilə qısa vaxtda çalışdığı kollektivin sevimlisinə çevrilib. Adı hər yerdə hörmətlə çəkilib. Sanatoriyaya istirahətə gələnlər də ondan razılıqla ayrılıblar.
Qurban Bayraməli oğlunun buradakı fəaliyyəti təkcə həkim-stomotoloq kimi çalışmaqla məhdudlaşmayıb. Daim axtarışda olub, tibbin ən son yeniliklərini belə mənimsəməyə çalışıb. Bir sıra elmi-praktik konfrans və seminarlarda iştirak edib. Dəfələrlə Moskva, Almatı, Tbilisi və digər şəhərlərdə xidməti ezamiyyətdə olub.
O, çalışdığı kollektivin və şəhərin ictimai həyatında da yaxından iştirak edib. 1971-ci ildə onu həm də Naftalan şəhər Kurort Birliyi həmkarlar komitəsinin sədri vəzifəsinə seçiblər. Həkim-stomotoloq kimi fəaliyyətini davam etdirməklə yanaşı, ömrünün sonuna qədər həm də bu vəzifədə çalışıb.
Bütün əmək fəaliyyəti Naftalanla bağlı olan Q.Piriyev bu şəhərin sayılıb-seçilən, hörmətli sakinlərindən olub. Onu burada həm də nümunəvi ailə başçısı kimi tanıyıblar. 1969-cu ildə ailə həyatı qurub və 3 övlad boya-başa çatdırıb.
İnsanın özü bilməsə də, Allah hərəyə bəlli bir ömür payı yazır. Yazıqlar olsun o adama ki, ömrü ləyaqətlə yaşayıb yaddaşlara köçə bilmir. Qurban həkim cəmisi 66 il ömür sürüb, 2005-ci il mayın 20-də vəfat edib. İnsan üçün 66 il elə də böyük zaman kəsimi hesab olunmasa da, ləyaqətlə yaşaya bilənlər üçün az da deyil. Bu mənada, Q.Piriyevi xoşbəxt talelilərdən hesab etmək mümkündür. Çünki qismətinə yazılan ömür payını şərəflə yaşayıb, istər çalışdığı kollektivdə, istərsə də ictimaiyyət arasında böyük hörmət və nüfuz qazanıb, kimsənin yanında gözükölgəli olmayıb. Bir də ona görə xoşbəxt talelərindəndir deyirəm ki, özündən sonra ləyaqətli övladları qalıb.
Tale elə gətirdi ki, Qurban Piriyevin vəfatından neçə il sonra Naftalana gedəsi oldum. Dostları və iş yoldaşları ilə həmsöhbət oldum. İnsan sağlığında nə qədər sevilərmiş. Qurban həkimi sevgi ilə, məhəbbətlə xatırlamayana rast gəlmədim. Möcüzəli Naftalan sanatoriyasının baş həkimi Gültəkin həkimdən başlamış, Tapqaraqoyunlu kəndinin sakini, iş adamı Rafiq Oktay oğlu İbrahimova kimi hamı Qurban həkimdən ağızdolusu danışırdı. Qurban həkim əməlləri ilə insanlıq zirvəsinə qədər ucalmışdı. Naftalan şəhərinin sakinləri indi də onun yoxluğu ilə barışa bilmirlər. Hamısı bir ağızdan deyir ki, Qurban həkimin timsalında ən gözəl insanı itirdik.
Xalq şairi Məmməd Rahimin bir müdrik kəlamını xatırlayıram:
Yarat! Sən köçəndə ellər söyləsin,
Dünyadan nə gözəl bir insan gedir.
Bəli! Bu, həqiqət idi. İnsanların qəlbində heykəlləşən həqiqət. Bir ömrü kisi kimi yaşayıb, kişi kimi başa vurub, şirin xatirəyə çevrilərək yaddaşlara köçüb. Deməli, əbədi ölməzlik qazanıb Qurban həkim.
Mənbə : Səməndər Məmmədov – “Faxralılar”, Bakı – “Elm və təhsil” – 2017, I kitab.
