QISA MƏLUMAT
Əli Mahmud oğlu Əlizadə 1933-cü ildə Bolnisi rayonunun Faxralı kəndində anadan olmuşdur.
1941- 1952-ci illərdə Faxralı orta məktəbini, 1953 –1958-ci illərdə isə Azərbaycan Kənd Təsərrüfatı İnstitutunun baytarlıq fakültəsini bitirmişdir.
1958 – 1962-ci illərdə Faxralı kəndindəki “Qələbə” kolxozunda baş baytar həkimi işləmişdir.
1962-ci ildə mərhum professor Məhəmməd Əsəd oğlu Mehtiyevin rəhbərliyi altında tədqiqat aparmış, 1965-ci ildə namizədlik dissertasiyası müdafiə edərək biologiya elmləri namizədi elmi dərəcəsinə layiq görülmüşdür.
1965-ci ildə Kənd Təsərrüfatı Akademiyasında assistent, 1968-ci ildə isə dosent olmuşdur. 1979 – 1984-cü illərdə “Yoluxmayan xəstəliklər və klinik diaqnostika” kafedrasının müdiri, 1984 – 1987-ciillərdə institutun hazırlıq şöbəsinin müdiri, 1987 – 1989-cu illərdə isə baytarlıq fakültəsinin dekanı olmuşdur.
Əli Əlizadə 60-a yaxın elmi əsərin, o cümlədən 5 dərs vəsaitinin müəllifidir.
O, 1965-ci ildən 2000-ci ilədək 20 ittifaq və respublika səviyyəli elmi konfranslarda çıxış edib, məqalələr çap etdirmişdir.
Mənbə : REDAKTORDAN.
KAMİLLİYƏ GEDƏN YOL
Kamil insan, müdrik adam olmaq üçün insan çox mərhələdən keçməlidir. Ən azından çox oxumalı, çox öyrənməli və çox da gəzməlidir. İnsanın yorulmadan çalışması və mübarizə aparması bu zirvəyə gedən bir yoldur.
Nizami Gəncəvi yazır:
Ucalmaq istəsən, bir kamala çat,
Kamala ehtiram göstərir həyat.
Öz adına layiq işlər gör ki, sən,
Axırda utanma xəcalətindən.
Əli Mahmud oğlu Əlizadə bu ucalığa gedən yolda həmişə inamla addımlayıb. İnamla addımlayıb ki, kamala çatsın və vətəninə, elinə-obasına gərəkli insan olub.
Əli Əlizadə 1933-cü ildə Borçalıda – Lüksemburq (indiki Bolnisi) rayonunun Faxralı kəndində anadan olub. Həyatın ilk yolu orta məktəbdən keçdiyindən, o da başqaları kimi Faxralıdakı orta məktəbi bitirir. Təbii ki, orta məktəbi bitirəndə hər bir şagirdin ürəyində müqəddəs bir arzu olur – ali məktəbə daxil olmaq. O, elə həmin məqsədlə də Azərbaycan Kənd Təsərrüfatı İnstitutunun baytarlıq fakültəsinə daxil olur. Kənd təsərrüfatını və kənd həyatını yaxşı bilən və çox şeyi də öyrənməyə çalışan bu adam ali məktəbi bitirəndən sonra doğma kəndə qayıdaraq “Qələbə” kolxozunda baş baytar işləyir. Həmin illərdə onun elmə marağı birə-beşə artır və günlərin birində, yəni 1962-ci ildə professor Məhəmmməd Əsəd oğlu Mehdiyevin rəhbərliyi altında elmi-tədqiqat işi aparır. İşlədiyi mövzu tanınmış professorun xoşuna gəlir. Əlbəttə, bu mövzuda elmi iş yazmaq, onu araya-ərsəyə gətirmək və bu işi Elmi Şurada müdafiə etmək o qədər də asan deyildi. Amma Ə.Əlizadə gərgin zəhməti və elmi axtarışları nəticəsində bütün çətinlikləri dəf edib arxada qoyur. Onun arxada qoyduğu həm də yaddaqalan xoş xatirələr və izlər idi. O izlər ki, Əli Əlizadə onu elm sahəsində qoymuşdu.
1965-ci ildə biologiya elmləri namizədi elmi dərəcəsi alan bu ziyalı insan Kənd Təsərrüfatı Akademiyasında assisent və dosent işləmiş, bir müddət ötəndən sonra isə “Yoluxmayan xəstəliklər və klinik diaqnostika” kafedrasında müdir vəzifəsində çalışıb. Sonralar isə ali məktəbin hazırlıq şöbəsində müdir və baytarlıq fakültəsinin dekanı olub.
Bu gün isə böyük alim Əli Əlizadə “Terapiya, klinik diaqnostika və cərrahiyə” kafedrasının müdiri işləyir. Onun nə az, nə çox – 60-a yaxın elmi əsəri və 5 dərs vəsaiti var. Müxtəlif dövrlərdə Əli müəllim ittifaq və respublika səviyyəli konfranslarda çıxış edib. Elmi məqalələri ilə çoxlarını təəccübləndirən Əli Əlizadə həmişə bir alim kimi yeni söz və fikir deməyi bacarıb.
Mənbə : Səməndər Məmmədov – “Faxralılar”, Bakı – “Elm və təhsil” – 2017, I kitab.
