Faxralı kəndində XX əsr Azərbaycan şifahi poeziyasının görkəmli nümayəndələrindən biri, el şairi Qara Qəribin (1902–1978) yaradıcılığına həsr olunmuş tədbir təşkil edilib. Yaradıcılıq günü çərçivəsində şairin həyat yolu, sənətkarlığı və el ədəbiyyatındakı yeri xatırlanıb, şeirlərindən nümunələr səsləndirilib.
El arasında Kablayı Qara kimi tanınan Qara Qərib güclü hafizəsi və bədahətən şeir söyləmək qabiliyyəti ilə seçilib. Öz yaradıcılığını tam əzbər bilən şair fərdi təhsil alıb, 1930-cu illərdə Faxralı kənd məktəbində müəllim işləyib. Borçalı bölgəsinin bir çox şair və aşıqları ilə deyişmələrdə iştirak edib. Onun yaradıcılığı əsasən şifahi şəkildə yayılıb. Şairə Güllər Pərisi ana nənəsi, şair Nəbi isə ustadı olub.
Qara Qərib klassik aşıq ədəbiyyatının demək olar ki, bütün janrlarında qələm çəkib. Onun poeziyasında təbiətin gözəlliyi ilə insanın mənəvi dünyası vəhdət təşkil edir. Hicran, sevgi, giley, qürur və üsyan motivləri şairin yaradıcılığında paralel şəkildə yer alır. Qaraxaç kimi doğma məkanların poetik təsviri, təbiətin ecazkarlığından təsəlli tapmaq duyğusu onun şeirlərində xüsusi yer tutur.
Tədbirdə Qara Qəribin oxucunu xeyirxahlığa, yaxşı ad qoyub getməyə çağıran fikirləri də vurğulanıb. Şairin sevgi şeirlərinin ünvanlı olması, gördüyü gözəlliklərə biganə qalmaması onun poeziyasının əsas xüsusiyyətlərindən biri kimi qeyd edilib.
