Mahal Şaban oğlu Qurbanov 24 noyabr 2025-ci il tarixində, 68 yaşında xəstəlik səbəbilə dünyasını dəyişmiş və Sumqayıt şəhərində dəfn olunmuşdur. Mahal müəllimin vəfatı təkcə ailəsi üçün deyil, onu tanıyan, ondan dərs alan yüzlərlə insan üçün böyük itkidir.
1957-ci il fevralın 16-da Bolnisi rayonunun Faxralı kəndində anadan olan Mahal Qurbanov bütün həyatını elmə və təhsilə həsr etmişdir. Faxralı orta məktəbindən başlayan bu yol onu Azərbaycan Dövlət Universitetinin mexanika-riyaziyyat fakültəsinə, oradan isə uzun illər pedaqoji fəaliyyətə aparmışdır.
O, Marneuli, Gəncə və digər şəhərlərdə müəllim, dosent, kafedra əməkdaşı, prorektor kimi çalışmış, minlərlə tələbənin formalaşmasında iştirak etmişdir. 2013-cü ildə pedaqogika üzrə elmlər doktoru elmi dərəcəsini almış, 2020-ci ildə professor adına layiq görülmüşdür.
Mahal Qurbanovun 15 elmi əsəri, çoxsaylı məqalələri və konfrans çıxışları onun elmə verdiyi töhfələrin yazılı sübutudur. Lakin onu tanıyanlar üçün o, sadəcə alim deyil – sakit, prinsipial, tələbkar və ədalətli bir müəllim idi.
Vəfatının 40-cı günündə Mahal müəllimin əziz xatirəsini hörmətlə anır, ailəsinə və yaxınlarına səbr diləyirik.
Allah rəhmət eləsin.
