Səyyarə Yolçu qızı Əlizadə 1950-ci ildə Faxralıda anadan olub. 1967-ci ildə Faxralı orta məktəbini, 1971-ci ildə Azərbaycan Dövlət Xalq Təsərrüfatı İnstititunu (indiki İqtisad Universiteti) bitirib. Şeirləri mətbuatda dərc olunub.
SƏNDƏN AYRILA BİLMİRƏM
Xoş camallı, şirin sözlü,
Səndən ayrıla bilmirəm.
İpək telli, gülər üzlü,
Səndən ayrıla bilmirəm.
Gizlin-gizlin oda yandım,
Səni saflıq tacı sandım.
Sədaqətdi eşqin, andın,
Səndən ayrıla bilmirəm.
Təbiətin, bil, varısan,
Saf məhəbbət timsalısan.
Zirvələrin ağ qarısan,
Səndən ayrıla bilmirəm.
Heç bilmirəm haralısan,
Canım ilə tən yarısan.
Sən eşqimin vüqarısan,
Səndən ayrıla bilmirəm.
